LA SARDEGNA, DALA AUTONOMIA ALA INDIPENDENSA?

Sol numero pasà ghemo prexentà la Corsica. Poki kilometri pì a sud ghe xè naltra perla del Mediteraneo, la Sardegna.
La Sardegna, co i so 1800 kilometri sirca de coste, la xé, par la so poxisión jeografica e par la so storia, una dele destinasión pì dexideràe par ki ke ga la pasión dei sport nautisi e par ki ke in jenere ghe piaxe el mare. La ixola la xè granda 29.090 Km2 e dopo la Sicilia la xè la seconda del Mediteraneo.
Da sto mare xè vegnùi i tanti invaxori foresti ke, in te la milenaria storia dela ixola i ga sakejà ma anca colonixà sta tera.
La Sardegna se pole paragonare a on picolo continente, parkè le difarense tra le varie rejon ke conpone sta ixola le xè tante. Se capìse mejo sta roba navigando ‘torno la ixola: dal mare se pole vedare i difarenti tipi de coste, le longhe spiaje de sabia fina, le coste e i promontori rocioxi, i graniti e le falesie calcaree, gustando (mejo se so na barca a vela) i rumori (ma soratuto i silensi) e i profumi del paesajo mediteraneo sardo. Dala costa riva el profumo de rosmarìn, de xenevro, de fiori selvàdeghi e la roba mejo xè de fermarse so uno dei tanti aprodi dela ixola par fare na picola escursión rento, magari in serca de on nuraghe o anca solo par conosare on fià la jente del posto.
Ma anca ki no ga l’oportunità de poder viajare in barca el pole goderse lo steso sta tera on mucio bela, katando da dormire so uno dei tanti alberghi o canping ke so sti ultimi ani i xè stai costruii (anca se a volte ste costrusión ga sasinà dele xone de verde stupende!).
El Popolo Sardo el xè famoxo par la granda ospitalità e se riusirè a superare le prime difidense inisiali katarè sicuramente l’ocaxión de conosare dele bele persone, magari sentài a tola magnando on fià de specialità dela cuxina sarda.

Scrivi on comento

Lascia un commento

Il tuo indirizzo email non sarà pubblicato. I campi obbligatori sono contrassegnati *


NOTA BEN: la Botega de Raixe Venete par qualche jorno no sarà ativa: tuti i ordini i vegnerà evaxi da metà setenbre, dopo la Festa dei Veneti 2017 che se tegnerà a Cittadella/Sitadela -PD- el 9 e 10 de setenbre! Te spetemo a la Festa co tuti i nostri prodoti!