Prima de tuto: sti Forum de discusión i xe verti a tuti e chi che scrive no xe dito che'l fàsa parte de la Asociasion culturale Veneto Nostro - Raixe Venete.
Donca, i temi tratà, le texi portà vanti, le idee e i pareri che pol vegner fora NO XE DITO che i coincida co el pensiero de Raixe Venete.
Invitemo tuti, soratuto chi che riva pa la prima volta, a considerare sto Forum cofà on Filò, indove tuti porta on so punto de vista, ma a no jeneralixàr atribuendo tuto quelo che vien scrito a Raixe Venete.

Secondo argomento: co semo partìi qualche ano indrìo co la esperiensa de Raixe Venete (jornale) lo ghemo fato co l'intento de informar i veneti e dar voxe e fòrsa a temi che ne pòsa métare insieme, de sora de le divixion de partiti o ideolojìe de drita e sanca (destra-sinistra) che da màsa ani xe drio divìdare i Veneti. La Cultura invése méte insieme.

Subito semo pasà a internet, on strumento inportante pa portar vanti i stési principi, drio el slogan "INSIEME CO LE NOSTRE TRADISION, CONTRO LE NOSTRE DIVIXION".

Càpita purtropo anca soi nostri Forum che serte discusión le dejenera in beghe de partito o de scrontri personali, quelo che NO volemo che sto Forum el deventa.
Sto spàsio lìbaro el xe fato pa scanbiarse informasion, pa tegnerse ajornà sora tuto quelo che càpita al Popolo Veneto e, soratuto, sora le proposte concrete pa colaborar e far nàsare projeti che podemo portar vanti tuti insieme pal ben de la nostra xente.

STO FORUM NO XE on spàsio pa sfogarse, pa darghe contro el partito che stà da st'altra parte rispèto al propio, pa far propaganda pa on partito o pa st'altro, pa farse bei co atejamenti tipo "ti no te sè chi che son mi" o "cosa vuto dire ti che te sì de sto partito o de st'altro".

STO FORUM EL XE on strumento inportante pa crésare insieme e pa far crésare la UNITA' dei Veneti 'torno a la nostra IDENTITA' e CULTURA.

S-ciarìo tuti sti principi se invita TUTI a:

- evitar contrasti, polemiche, ofexe personali e judìsi personali contro uno o st'altro
- catar el pì posìbile maniere pa colaborar e métar insieme le fòrse
- demostrarse umili quanto basta inte le varie discusion: qua no ghe xe uno pì bravo de st'altro, ma tuti podemo fare la nostra parte pal futuro del nostro Popolo.

PA CHI CHE VOL NDAR VANTI CO LE POLEMICHE FRA PARTITI O SO DISCORSI DE STO TIPO li invitemo a scrìvare so altre parti, internet xe pien de posti indove se pol sfogarse, qua ghemo regole e principi difarenti che ne móve.

Contemo donca so la intelijensa de TUTI quei che scrive. I mesaji polèmici, de discusion forumista contro forumista, partito contro partito o de propaganda contro o pro qualchedun i vegnerà cavà.

La Redasion de Raixe Venete.