Salve,

Ve informemo ke oncuó, 15 Jugno 2003, verxe el novo portale sora la Cultura Veneta: www.culturaveneta.org

Sto novo sito Internet el xe dedicà a tute le Asociasión e Grupi Culturali ke i opera sora la cultura veneta.

CulturaVeneta.org el nase dala exijensa de crear on strumento ke el posa valorixare e publicixare tute le inisiative ke, in te l’anbito culturale, le vién organixà in tel Veneto.

CulturaVeneta.org el xe on strumento fasile e velose da doprare e el pol arkiviar, condividare e prexentar al navigadore i recapiti, le atività, le finalità e i eventi organixà dai grupi culturali ke partesipa al “Coordinamento Associazioni Venete”.

Sto portale el vuol esare alora na vetrina par le inisiative culturali venete e par le asociasión ke le se inpegna in te l’anbito de la cultura veneta. El xe on projeto destinà a cresare, verto a tuti i grupi culturali ke i vorà farghine parte.

Se auguremo ke el posa esare on strumento utile par valorixar e difondare el pì posibile la cultura veneta, portandola a conosensa magari a quei ke no i la conosce xa e ke i scomisia solo ke deso a vardare a sta nostra realtà.

Cultura Veneta vol dir lengoa, storia, tradisión, musica, modi di vivare e di pensare ke i fa parte del popolo veneto. El xe on bagajo on mucio grando ke el ne apartién e ke volemo tutelare, valorixare e condividare co st’altri.

Saludi,
Coordinamento Asociasión Venete

_______________________________________

Par informasión:
e-mail: info@raixevenete.net
fax: 041/4165856