Forse xe mejo dire pa primo che no semo on partito politico e no serchemo voti. Femo Cultura, sercando de risvejare fra la nostra xente na memoria stòrica che ga visto el Popolo Veneto un faro de civiltà, exenpio de potensa, bongoverno e justìsia pa tuto el mondo, tanto che anca i padri fondatori de l'America i xe vegnésti a Venesia pa capire e ciapare exenpio dal nostro sistema de jestion politico e sociale. Savemo che i temi che tratemo serte volte i ga on inpàto so la politica: domandemo riconosimenti uficiali pa la Lengua Veneta, par exenpio, o el dirito de inparare la Storia Veneta, la nostra Storia, inte le scole e tante altre bataje culturali e identitarie. Pì che far politica serchemo in tuti i modi de far presion so la clàse politica parché la daga finalmente risposte concrete pa la nostra xente, richieste che riva dal teritorio. Coi politici, trasversalmete da detra a sinistra, serchemo el dialogo e se serve semo pronti co chiunque a colaborare pa portar caxa qualche inportante rixultato a favore dei Veneti.

Raixe Venete organixa periodicamente sol teritorio convegni de storia e cultura veneta in colaborasión anca co aministrasión comunali e altre realtà asociative. El primo fine stimana de setenbre, a Sitadela (PD) organexemo na granda Festa, la "Festa dei Veneti", on Evento che dura 3 jorni, dedicà a la cultura veneta in tute le so forme: da la muxica ale rievocasion e celebrasion stòriche, dala cuxina al teatro e al cabarè in veneto. Pa celebrar la Festa del Popolo Veneto, evento istituìo co Lege rejonale 08/2007, semo organixadori e promotori de la Marcia da San Marco a San Marco, on Camino che vede ogni àno sentenari de veneti 'traversar la nostra Region dal Lago de Garda fin a Venesia, pasandose de man in man la Bandiera de San Marco, bandiera che ala fine de l'Evento vien consegnà inte le man del Patriarca de Venesia che la custodirà fin a la edisión seguente. Semo ativi sol teritorio anca co manifestasión, incontri e dibatiti, in particolare co tuta na serie de Convegni che organexemo periodicamente: fra i temi tratà "Napoleon e la fine de la Serenìsima", "l'Arsenale de Venesia", "i Veneti Antichi", "la Civiltà de le Ville Venete", "Storia generale dela Serenìsima", "El plebiscito truffa del 1866 - come i Veneti xe deventà italiani" e tanto altro ancora....

Basta solo che te ne contàti o vien catarne ai nostri bancheti e incontri sol teritorio, te spiegaremo mejo cosa che femo e vedaremo come colaborar insieme. Raixe Venete ga raquanti grupi teritoriali che i se trova na volta al mexe (in particolare a Vicensa, Padova, Venesia e Trevixo), podaremo darte tuti i riferimenti pa partesipar a ste serate. La nostra e-mail xe info@raixevenete.net o senò scrivi diretamente dala pajina dei Contati.